iltija sun lo shaah-e-umam ke liye
kar do, kar do karam, murshid-e-mohtaram !
tum ko bheja gaya hai karam ke liye
KHwaja-e-KHwajgaa.n ! haami-e-be-kasaa.n !
iltija sun lo shaah-e-umam ke liye
noor-e-shaah-e-najaf ! mere KHwaja piya !
teri chaukhat pe haazir hai.n shaah-o-gada
KHaliq-e-do-jahaa.n se ye rutba mila
tere darbaar-e-faiz-o-karam ke liye
KHwaja-e-KHwajgaa.n ! haami-e-be-kasaa.n !
iltija sun lo shaah-e-umam ke liye
shaah-e-ajmer ! mera maseeha hai tu
dard-mando.n ke dukh ka madaawa hai tu
teri nisbat ka daaman rahe haath me.n
bas dawa hai yahi ranj-o-Gam ke liye
KHwaja-e-KHwajgaa.n ! haami-e-be-kasaa.n !
iltija sun lo shaah-e-umam ke liye
thaamna haath, ai sayyid-e-mehrbaa.n !
hai tera kaam, KHwaja ! KHata-poshiyaa.n
laaj rakhna Fana kee, mu'een-e-jahaa.n !
hashr me.n, taajdaar-e-haram ke liye
KHwaja-e-KHwajgaa.n ! haami-e-be-kasaa.n !
iltija sun lo shaah-e-umam ke liye
No comments:
Post a Comment